7 nəfər öldü: ABŞ-də milyonlarla insan risk altındadır

Aprelin 4-də ABŞ-nin Ortabatı və Cənub bölgələrinə yağan leysan yağışlar və baş verən daşqınlar ciddi fəsadlara səbəb olub. 

TodayPress xəbər verir ki, “CBS News”un məlumatına görə, həftənin əvvəlində baş verən tornado dalğası nəticəsində azı 7 nəfər həyatını itirib.

Milli Hava Proqnozu Mərkəzi bəzi bölgələrdə “tarixi” səviyyədə yağıntı və “həyat üçün təhlükəli qəfil daşqın” riski barədə xəbərdarlıq edib.

Ohio vadisinin cənub hissəsində, Orta Cənub və Ozark bölgələrində yağıntının 10–15 düym (25–38 sm) və daha artıq olduğu bildirilib.

Təhlükənin episentri Tennessi ştatındakı Memfis şəhəri ətrafında, Missisipi çayı boyunca yerləşən zonanı əhatə edir. Bu ərazidə 1,3 milyon insan yaşayır.

Oklahoma ştatında yerləşən Fırtına Proqnozları Mərkəzinin məlumatına görə, Texasdan Minnesota və Maineyə qədər 90 milyon insan sərt hava şəraitinin təsiri altındadır.

Kentukkidə yerləşən Hopkinsvill şəhərinin işgüzar mərkəzi su altında qalıb, onlarla sakin və ev heyvanı xilas edilib.

İlkin fırtına dalğasında Tennessidə 5, Missuri və İndianada isə hərəsində 1 nəfər olmaqla azı 7 nəfər həyatını itirib. 

Qiymət Mahir