ABŞ rəsmisi: Rusiya-ABŞ danışıqları yalnız diplomatik missiyaların fəaliyyətinə yönələcək

"Rusiya-ABŞ danışığında əsas diqqət iki ölkənin diplomatik missiyalarının fəaliyyəti ilə bağlı olacaq. Nə Ukrayna, nə də siyasi və ya təhlükəsizlik məsələləri müzakirə olunmayacaq"

TodayPress xəbər verir ki, bunu ABŞ Dövlət Departamentinin sözçüsü Tammy Bruce brifinqdə bildirib.

“Aprelin 10-da ABŞ və Rusiya nümayəndə heyətləri ikitərəfli missiyalarımızın əməliyyatlarının daha da sabitləşdirilməsində irəliləyişə nail olmaq üçün İstanbulda ikinci dəfə görüşəcəklər. Gündəmdə heç bir siyasi və ya təhlükəsizlik məsələsi yoxdur və Ukrayna tamamilə gündəmdə deyil” deyə o bildirib.

Rusiya Xarici İşlər Nazirliyindən "TASS"a verilən məlumata görə, İstanbulda keçiriləcək Rusiya-ABŞ məsləhətləşmələrinin ikinci raundunda Rusiya nümayəndə heyətinə Vaşinqtondakı səfir Aleksandr Darçiyev və ABŞ nümayəndə heyətinə ABŞ dövlət katibinin Rusiya və Mərkəzi Avropa üzrə köməkçisinin müavini Sonata Koulter rəhbərlik edəcək.

Aynur TAC