Aİ iqtisadi təzyiqlərə qarşı əsas müdafiə üsulunu açıqladı

Avropanın qarşısında duran yeni iqtisadi çağırışlara, ABŞ-nin tarif qərarları, ictimai borcların artması və texnoloji nəhənglərin güclənməsi fonunda yalnız birgə mövqe ilə cavab vermək mümkündür. 

TodayPress xəbər verir ki, bu fikir Romada keçirilən “Tramp dövründə Avropanı və İtaliyanı idarə etmək” adlı konfransda səsləndirilib.

LUISS Universitetinin təşkil etdiyi tədbirdə sabiq İtaliya baş nazirləri Mario Monti və Culiano Amato, maliyyə naziri Cankarlo Corcetti, Avropa Komissiyasının vitse-prezidenti Raffaele Fitto və universitetin professorları iştirak edib.

Monti bildirib ki, bu gün Avropa böhranlarla ilk dəfə üzləşmir: 

“Lakin bu çağırışların öhdəsindən yalnız birlikdə gələ bilərik. ABŞ prezidenti Donald Trampın yeni 25%-lik tarif qərarı və onun ardınca aprelin 2-də gözlənilən növbəti mərhələ Avropanı strateji qərarlar verməyə məcbur edir”.

Konfransın kənar müzakirələrində LUISS professoru Pietro Reyxlin “Xinhua” agentliyinə bildirib ki, Tramp administrasiyasının proqnozlaşdırılması çətin ticarət siyasəti Avropa İttifaqının (Aİ) cavab imkanlarını çətinləşdirir:

“ABŞ-nin məqsədlərini düzgün başa düşmək razılaşmaya aparan yoldur. Aİ-nin mallar üzrə ticarət profisiti və ABŞ-nin xidmət və enerji sahəsindəki üstünlükləri müzakirə üçün əsas mövzulardır”.

İtaliyanın maliyyə naziri Corcetti isə borcun sürətlə artmasını və ABŞ texnologiya şirkətlərinin, xüsusilə Google və süni intellekt sahəsindəki dominant oyunçuların siyasətçilərin əlini daraltdığını deyib.

Avropa Statistika İdarəsinin (Eurostat) məlumatına görə, 2024-cü ilin üçüncü rübündə Aİ-də dövlət borcu ÜDM-in 81,6%-nə, Avrozonada isə 88,1%-ə çatıb. İtaliyanın borc göstəricisi 136,3% ilə yalnız Yunanıstandan geri qalır.

Qiymət Mahir