Aİ Moldovaya 1,9 milyard avro maliyyə ayıracaq

Avropa İttifaqı Şurası (Aİ) Moldovanın islahatlarını və iqtisadi inkişafını dəstəkləmək üçün 1,9 milyard avro ayırmaq barədə yekun qərarını açıqlayıb.

TodayPress xəbər verir ki, bu barədə Avropa İttifaqı Şurasına sədrlik edən Polşanın Avropa məsələləri üzrə naziri Adam Şlapka bildirib. 

“Bu gün biz moldovanlara əsas sosial-iqtisadi islahatları irəlilətməyə, iqtisadiyyatlarını canlandırmağa və ölkənin Aİ-yə üzvlüyünü sürətləndirməyə kömək edirik” deyə o, bildirib. 

Bu qərarla Aİ ölkələri Moldova üçün İslahat və İqtisadi İnkişaf Fondunun yaradılmasına yekdilliklə razılıq veriblər.

Sənəddə qeyd olunur ki, yeni fond Aİ ilə bağlı islahatları və iqtisadi inkişafı dəstəkləmək üçün nəzərdə tutulub. 

Avropa İttifaqı Şurasının açıqlamasına görə, 1,9 milyard avroluq maliyyə paketi müstəqilliyini qazandıqdan bəri Moldovaya verilən ən iri Aİ dəstək paketi olacaq və Kiyevə göstərilən digər əhəmiyyətli yardımları tamamlayacaq. 

Şuranın fikrincə, bu maliyyə yardımı Moldovanın iqtisadiyyatını gücləndirəcək və ölkəni Aİ-yə daha da yaxınlaşdıracaq. 

Bundan sonra Moldova üçün İslahat və İqtisadi İnkişaf Fondunun yaradılması ilə bağlı qərar Avropa İttifaqı Şurası və Avropa Parlamenti rəhbərləri tərəfindən imzalanacaq, “Rəsmi Jurnal”da dərc ediləcək və nəşrdən sonrakı gün qüvvəyə minəcək. 

Qiymət Mahir