Avstraliyada ilk dəfə tam süni ürək implantı olan xəstə evə buraxıldı

Avstraliyalı bir kişi ürək çatışmazlığı diaqnozu ilə dünyada ilk dəfə tam süni ürək implantı ilə xəstəxanadan evə buraxılıb.

TodayPress xəbər verir ki, bu barədə “The Guardian” məlumat yayıb.

Avstraliyalı tədqiqatçılar və həkimlər bildiriblər ki, implantın istifadəsi tam klinik uğur olub. Belə ki, xəstə cihazla 100 gündən çox yaşayıb və martın əvvəlində ona donor ürək köçürülüb. BiVACOR adlanan tam süni ürək Dr. Daniel Timms tərəfindən icad edilib.

Bu, dünyada ilk implantasiya olunan fırlanan qan nasosudur. O, insan ürəyini tamamilə əvəz edə bilir və sağlam ürəyin təbii qan axınını təqlid etmək üçün maqnit levitasiya texnologiyasından istifadə edir. Hazırda klinik sınaqların erkən mərhələsində olan bu implant terminal mərhələdə biventrikulyar ürək çatışmazlığı olan xəstələr üçün nəzərdə tutulub. Xəstəlik əsasən infarkt, ürəyin işemik xəstəliyi və diabet kimi digər sağlamlıq problemləri nəticəsində yaranır.

Bu xəstəliklər ürəyi zəiflədir və onun orqanizmdə qan dövranını təmin etməsini çətinləşdirir. Avstraliya hökumətinin məlumatına görə, dünyada hər il 23 milyondan çox insan ürək çatışmazlığından əziyyət çəkir, lakin onlardan cəmi 6 min nəfəri donor ürək ala bilir.

Buna görə də hökumət “Süni Ürək Sərhədləri” proqramı çərçivəsində BiVACOR cihazının inkişafına və kommersiyalaşdırılmasına 50 milyon dollar ayırıb.

BiVACOR ilkin olaraq donor ürək transplantasiyasına qədər xəstələrin həyatını qorumaq üçün nəzərdə tutulsa da, onun uzunmüddətli məqsədi insanlara bu cihazla normal həyat yaşamaq imkanı verməkdir.

Qiymət Mahir