Banqladeşdə 700 milyon dollarlıq layihəyə start verildi

Banqladeşin ən yüksək iqtisadi qərarverici orqanı olan Milli İqtisadi Şuranın İcraiyyə Komitəsi (ECNEC) ölkənin ən böyük dəniz limanı olan Çattogram limanının genişləndirilməsi üçün 135,25 milyard taka (təxminən 700 milyon ABŞ dolları) dəyərində layihəni təsdiqləyib.

TodayPress “Xinhua”ya istinadən xəbər verir ki, bu barədə məlumatı Banqladeşin Çattogram Liman İdarəsinin (CPA) katibi Məhəmməd Ömər Faruk verib.

Onun sözlərinə görə, “Bay Terminalin Dəniz İnfrastrukturunun İnkişafı Layihəsi” beynəlxalq podratçıların cəlb olunması üçün tender mərhələsinə keçəcək. Layihənin 41,92 milyard takası CPA-nın daxili vəsaiti hesabına qarşılanacaq, qalan 93,33 milyard taka isə xarici kreditlər hesabına təmin olunacaq.

Rəsmi bildirib ki, Dünya Bankı artıq 650 milyon ABŞ dolları məbləğində kreditin ayrılmasını təsdiqləyib. Bu vəsait dalğaqıranın inşası və giriş kanalının dərinləşdirilməsi kimi əsas texniki komponentlərə sərf olunacaq.

Layihəyə əsasən, 4 kilometrlik sahil xətti boyunca iki konteyner terminalı və bir çoxfunksiyalı terminal inşa olunacaq, ümumilikdə 13 körpü tikiləcək və 6,217 kilometrlik dalğaqıran qurulacaq.

Qeyd edək ki, Çattogram limanı Banqladeşin cənub-şərqində, Karnaphuli çayı üzərində yerləşir və ölkənin beynəlxalq dəniz ticarətinin 90 faizini həyata keçirir.

Qiymət Mahir