Dünya Bankı: Nepalın iqtisadi artımı 7 yox, 4 faiz olacaq

Nepal 2029-cu ilə qədər illik 7.1 faizlik iqtisadi artım hədəfi müəyyənləşdirib, lakin bu məqsədin real icrası sual altındadır. 

TodayPress xəbər verir ki, bu barədə Dünya Bankı “Nepalın İqtisadi Potensialının Açılması: Nepal Ölkə İqtisadi Memorandumu 2025” adlı yeni hesabatında məlumat yayıb. 

Hesabata görə, Nepalın 16-cı beşillik inkişaf planı bu dövr üçün yüksək artım tempi proqnozlaşdırsa da, mövcud siyasətlər bu hədəflərə çatmaq üçün kifayət etmir.

Dünya Bankının bazal ssenarisinə əsasən, ölkənin real iqtisadi artımı 4 faiz səviyyəsində qalacaq. 

1996–2023-cü illərdə Nepalın orta illik iqtisadi artımı 4.2 faiz olub. Region ölkələri ilə müqayisədə bu, Cənubi Asiyada səkkiz ölkə arasında altıncı yerdir.

Hesabatda qeyd edilir ki, ölkədən kənara miqrasiya və pul köçürmələri yoxsulluğun azaldılmasına və iqtisadi dayanıqlığa yardım etsə də, ölkə qeyri-kənd təsərrüfatı sektorlarında kifayət qədər keyfiyyətli iş yerləri yarada bilməyib. 

Qurum bildirib ki, struktur problemlər hələ də iqtisadi inkişafı və yeni iş yerlərinin yaradılmasını əngəlləyir. 

Qiymət Mahir