Hindistanın LNG idxalı rekord həddə çatdı

Dünyanın ən sürətlə böyüyən mayeləşdirilmiş təbii qaz (LNG) istehlakçılarından biri olan Hindistan 2024-cü ildə idxalını 26% artıraraq 27,869 milyon tona çatdırıb.   

TodayPress xəbər verir ki, bu barədə ölkənin Ticarət və Sənaye Nazirliyi məlumat yayıb. 

Bildirilib ki, bu, 2020-ci ildə qeydə alınan 26,6 milyon tonluq əvvəlki rekordu geridə qoyub. 

Bu göstərici ilə Hindistan Avropanın ən iri LNG idxalçısı olan Fransanı geridə qoyub. Fransanın idxalı 2023-cü ildə 23 milyon ton, 2024-cü ildə isə 20 milyon ton olub. Hindistan indi daha böyük Asiya bazarlarına – Cənubi Koreya (47 milyon ton, 2024) kimi ölkələrə istiqamətlənir. 

26%-lik artım sayəsində Hindistan 2024-cü ildə ən böyük qaz istehlakçıları arasında ən sürətli böyüyən bazar olub. Çin, Cənubi Koreya və Tayvanda artım 5-7%, Yaponiyada sabitlik, Avropada isə 15%-lik azalma müşahidə edilib.  Hazırda Hindistanda ümumi gücü 47,7 milyon ton olan yeddi LNG terminalı fəaliyyət göstərir. 

Ölkənin 2024-cü ildə ən iri LNG tədarükçüsü Qətər olub – 11,38 milyon ton (41%-lik pay). Sonrakı yerləri ABŞ (5,42 milyon ton, 19%), BƏƏ (3,164 milyon ton, 11%) və Anqola (2,103 milyon ton, 8%) tutur.  2024-cü ilin dekabrında Hindistanın LNG idxalı 11% artaraq 2,135 milyon ton olub. Bu dövrdə Rusiyadan birbaşa LNG tədarükü həyata keçirilməyib. Ancaq Hindistan Kamerundan bir partiya LNG qəbul edib.

İl ərzində ölkəyə Kamerundan ümumilikdə 11 partiya qaz tədarük edilib.  Bu tədarük SEFE (keçmiş “Gazprom Marketing & Trading”) tərəfindən həyata keçirilən svop (mübadilə) sxemi çərçivəsində baş tutub.

Bununla yanaşı, “Yamal LNG” qazı başqa müştərilərə göndərilib. 

Hindistan Energetika Nazirliyinin ilkin məlumatlarına görə, 2025-ci ilin yanvarında ölkənin LNG idxalı daha 9% artaraq 2,3 milyon tona çatıb. 

Qiymət Mahir