Laos ÜDM-in 25 faizini təmin etməyi hədəfləyir

Laos Enerji və Mədən Nazirliyinin nümayəndələri digər aidiyyəti qurumlarla birgə 2024-cü ildə bu sahələrdə əldə edilən nailiyyətləri və gələcək planları müzakirə ediblər. Görüşdə enerji və mədən sənayesinin ölkənin sosial-iqtisadi inkişafına töhfəsi xüsusi vurğulanıb.

TodayPress xəbər verir ki, bu barədə “Lao National Radio” məlumat yayıb.

İclasda nazirlik və ona tabe olan müəssisələrin sektor üzrə inkişaf planlarının icrası nəzərdən keçirilib.

Laosun baş naziri Sonexay Siphandone 2026–2030-cu illər üzrə enerji və mədən sektorlarının inkişaf istiqamətlərini açıqlayıb. O, bu sahələrin sosial-iqtisadi inkişafda həlledici rol oynamalı olduğunu bildirib.

Baş nazir nazirliyə çağırış edərək bu sahələrin 2030-cu ilə qədər ölkənin ümumi daxili məhsulunun 25 faizini təmin etməsini və hər il 10–12 faiz arasında artım tempini qorumasını hədəf kimi müəyyən etməyi tövsiyə edib.

Bundan əlavə, o, mövcud qanun və qaydaların səmərəli icrasını, xüsusilə də ölkənin maliyyə böhranı ilə bağlı tədbirləri gücləndirməyi vacib sayıb.

Sonexay davamlı enerji inkişafını təşviq etməyin, təbii resursların qorunmasına diqqət yetirməyin, elektrik ötürücü sistemini genişləndirməyin və daxili tələbatla ixrac potensialı arasında balans yaratmağın əhəmiyyətini də vurğulayıb.

Qiymət Mahir