Macarıstanda banklara ATM-ləri işlək saxlamaq öhdəliyi qoyuldu

Macarıstan hökuməti ölkə üzrə banklara bütün bankomatların (ATM) işlək vəziyyətdə saxlanılmasını və filiallarda nağd pul çıxarışı xidmətlərinin davam etdirilməsini tələb edən fövqəladə fərman qüvvəyə minib.

TodayPress xəbər verir ki, bu addım baş nazir Viktor Orban tərəfindən imzalanmış fərman əsasında atılıb və məqsəd, sənəddə qeyd edildiyi kimi, “Brüsselin əsassız sanksiyalarının” – yəni Rusiya-Ukrayna müharibəsi ilə bağlı tətbiq edilən məhdudiyyətlərin əhalinin nağd pula çıxışını məhdudlaşdırmasının qarşısını almaqdır. 

Fərman martın 24-də axşam rəsmi dövlət qəzetində dərc olunub və martın 25-də qüvvəyə minib.

Fərmanda vurğulanıb ki, xüsusilə kənd yerlərində nağd vəsaitə çıxış milli prioritet sayılır və bu baxımdan hazırda mövcud olan ATM infrastrukturunun sökülməsi və ya bank filiallarında nağd pul xidməti dayandırılması qadağan edilir.

Qaydalara əməl etməyən maliyyə qurumları 2 milyon forintdən (təxminən 5,440 ABŞ dolları) 200 milyon forintədək (təxminən 544,000 ABŞ dolları) cərimə oluna bilərlər.

Bu tədbir, hökumətin ötən həftə açıqladığı daha geniş proqramın tərkib hissəsidir. Plana əsasən, Macarıstanın 3,155 bələdiyyəsinin hamısında bankomatların quraşdırılması nəzərdə tutulur. Hazırda bu məntəqələrin yalnız üçdə birində ATM-lər mövcuddur. “Portfolio” biznes portalının hesablamalarına görə, bu hədəfə çatmaq üçün 2000-dən çox yeni bankomatın quraşdırılması lazım olacaq.

Qiymət Mahir