Nadir xəstəliklər üçün ilk süni intellekt modeli təqdim olundu

Çində nadir xəstəliklərin erkən diaqnostikasına kömək etmək üçün ilk böyük dil modeli – “PUMCH-GENESIS” ictimai sınaq mərhələsinə keçib. 

TodayPress xəbər verir ki, bu model Pekinin “Səhə” Xəstəxanası (PUMCH) və Çin Elmlər Akademiyasının Avtomatlaşdırma İnstitutu tərəfindən birgə hazırlanıb.

Süni intellekt modeli diaqnostik sistem kimi fəaliyyət göstərərək, xəstənin qeyd etdiyi simptomları analiz edir və nadir genetik sindromlar, məsələn, “Rett” və “Angelman” sindromları barədə ilkin xəbərdarlıq verə bilir. Model həmçinin əlavə tibbi müayinələr və mütəxəssis konsultasiyaları üzrə tövsiyələr təqdim edir.

PUMCH xəstəxanasının məlumatına görə, model artıq ilkin diaqnostik məsləhətləşmələr və həkim qəbulu üçün qeydiyyat xidmətlərini sınaqdan keçirməyə başlayıb. Nadir xəstəliklər ayrı-ayrılıqda az rast gəlinən olsa da, onların ümumi müxtəlifliyi diaqnostika prosesini çətinləşdirir. Diaqnozun gecikməsi və səhv qoyulması xəstələr üçün ciddi problemlər yaradır. “PUMCH-GENESIS” bu boşluqları aradan qaldırmaq üçün hazırlanıb.

Xəstəxananın direktoru Çjan Şuyan bildirib ki, model Çin əhalisinin genetik və fiziki xüsusiyyətlərini nəzərə alaraq tərtib edilib. Süni intellektin kliniki praktikaya daha dərindən inteqrasiyası xəstəliklərin daha dəqiq və sürətli aşkarlanmasına imkan verəcək.

Hazırda model ictimaiyyət üçün ilkin sınaq mərhələsindədir. Növbəti mərhələdə həkimlər üçün nəzərdə tutulmuş əlavə funksiyalar – genetik məlumatların təhlili, tibbi sənədlərin hazırlanması və irsi xəstəliklər üzrə konsultasiyalar istifadəyə veriləcək.

Gələcəkdə “PUMCH-GENESIS” Çində nadir xəstəliklərin diaqnostikası və müalicəsi üzrə milli tibbi şəbəkəyə inteqrasiya ediləcək və daha geniş istifadəyə veriləcək.

Qiymət Mahir