Şahbaz Şərif: “Poliomielitə qarşı milli səfərbərlik elan edilib”

Pakistanın Baş naziri Şahbaz Şərif ölkədə poliomielit virusunun tamamilə məhv edilməsi üçün ümummilli səylərin və kompleks strategiyanın tətbiq olunduğunu bəyan edib.

TodayPress “Xinhua”ya istinadən xəbər verir ki, o, bu fikirləri aprelin 21-dən 27-dək keçiriləcək bir həftəlik milli peyvənd kampaniyasının açılış mərasimində səsləndirib. 

Baş nazirin sözlərinə görə, hökumət bu xəstəliyin aradan qaldırılması üçün birləşdirilmiş və davamlı strategiya həyata keçirir.

“Poliomielit təkcə uşaqlar üçün deyil, bütövlükdə cəmiyyət üçün təhlükədir” deyə Şərif bildirib və valideynləri, müəllimləri, dini liderləri, media nümayəndələrini və vətəndaş cəmiyyətini bu milli məqsədə dəstək verməyə çağırıb.

Kampaniya çərçivəsində 5 yaşadək milyonlarla uşağın immunizasiyası nəzərdə tutulur. Aksiyanın rəsmi startı zamanı baş nazir uşaqlara ağız yolu ilə peyvənd damcısı verərək kampaniyanın ikinci mərhələsini açıq elan edib.

Şərif həmçinin, sahədə çalışan tibb işçilərinə, könüllülərə və digər əməkdaşlara təşəkkürünü bildirib və onların fədakar fəaliyyətinin poliomielit hallarının əhəmiyyətli dərəcədə azalmasına səbəb olduğunu vurğulayıb.

Qeyd edək ki, Pakistan poliomielitin hələ də endemik olaraq mövcud olduğu azsaylı ölkələrdən biridir, lakin son illər ərzində aparılan intensiv tədbirlər nəticəsində xəstəlik hallarının sayı ciddi şəkildə azalıb.

Qiymət Mahir