Suriya söz verdi: İsraili təhdid etməyəcəklər

Suriyanın yeni hakimiyyət orqanları heç bir qonşu dövləti, o cümlədən İsraili təhdid etməyəcək və Fələstinin öz ərazilərindəki fəaliyyətlərini nəzarətə götürəcək. 

TodayPress “Elnashra” portalına istinadən xəbər verir ki, bu vədlər Dəməşqin ABŞ-yə göndərdiyi mesajda yer alır. 

Bildirilib ki, bu, Ağ Evin Ərəb Respublikasına qarşı sanksiyaların yumşaldılması üçün irəli sürdüyü ilkin şərtlərə cavabdır. 

Xatırladaq ki, Vaşinqton mart ayında səkkiz bənddən ibarət tələblərini irəli sürüb və Suriyadan həyata keçirilməsini tələb edib. Digər məsələlərlə yanaşı, müzakirələrə kimyəvi silah ehtiyatlarının məhv edilməsi və 2012-ci ildə Suriyada itkin düşmüş amerikalı müxbir Austin Taysın axtarışı da daxildir. ABŞ onun qaçırılmasında prezident Bəşər Əsədin başçılıq etdiyi ölkənin əvvəlki rəhbərliyini günahlandırıb.

Jurnalistlərin fikrincə, Suriya daxildəki qruplaşmalara qarşı birgə mübarizə aparmağa razılaşsa da, ABŞ-yə öz ərazisində müstəqil şəkildə hədəf seçmək və terrorçuların hədəflərinə zərbələr endirmək hüququ verməyib. 

Suriyalı diplomatik mənbə "Əl-İxbariyyə" telekanalına verdiyi şərhdə bildirib ki, Nyu-Yorkda olan Suriyanın keçid hökumətinin xarici işlər naziri Əsəd əl-Şibani ABŞ nümayəndələri ilə Dəməşqin cavab mesajını müzakirə edəcək. O, həmçinin ölkənin əsas məqamlarla bağlı mövqeyini daha ətraflı izah edə biləcək.

Töhfə Səməd