Tehranın "nüvə görüşü" başa çatdı - YENİLƏNDİ

İranın nüvə problemi ilə bağlı Pekində keçirilən Çin-Rusiya-İran görüşündən sonra tərəflər birgə bəyanat yayıb. 

TodayPress xəbər verir ki, bu barədə "TASS" məlumat yayıb. 

Bəyanatda bütün qeyri-qanuni birtərəfli sanksiyalara son qoymağa çağırış edilib:  “Çin, Rusiya və İran bütün qeyri-qanuni birtərəfli sanksiyalara son qoyulmasının vacibliyini vurğulayıblar. Onlar müvafiq tərəfləri əsas səbəbləri aradan qaldırmağa, sanksiyalardan, təzyiq taktikalarından və güc təhdidlərindən əl çəkməyə çağırıblar”. 

Qeyd edilib ki, tərəflər qarşılıqlı hörmətə əsaslanan siyasi və diplomatik dialoqun yeganə səmərəli həll yolu olduğunu bir daha vurğulayıb.

Üç ölkə Birləşmiş Millətlər Təşkilatının Təhlükəsizlik Şurasının 2231 saylı Qətnaməsinin əhəmiyyətini və onun müddətinin əhəmiyyətini bir daha təsdiqləyib.

Müvafiq tərəfləri vəziyyəti gərginləşdirmək üçün addımlar atmaqdan çəkinməyə və diplomatik səylər üçün əlverişli şərait yaratmağa çağırılıb.

Tərəflər yaxın məsləhətləşmələri və əməkdaşlığı gələcəkdə də davam etdirmək barədə razılığa gəliblər.

***

09:49

Pekində İranın nüvə problemi ilə bağlı Rusiya, Çin və İran nümayəndələrinin görüşü başlayıb. 

TodayPress xəbər verir ki, bu barədə "TASS" məlumat yayıb. 

Görüşə Çinin xarici işlər nazirinin müavini Ma Zhaoxu sədrlik edir.   

Tədbirdə Rusiyanı xarici işlər nazirinin müavini Sergey Ryabkov, İranı isə xarici işlər nazirinin müavini Kazem Gharibabadi təmsil edir. 

İclasda tərəflərin İrana qarşı Qərb sanksiyalarının ləğvi yollarını, eləcə də Tehran, Moskva və Pekin arasında əməkdaşlığı müzakirə edəcəyi gözlənilir. 

Qeyd edək ki, 2015-ci ildə Böyük Britaniya, Almaniya, Çin, Rusiya, ABŞ, Fransa İranın nüvə proqramını məhdudlaşdırmaq müqabilində sanksiyaların yüngülləşdirilməsini təklif edən nüvə sazişi əldə ediblər. 2018-ci ildə ABŞ müqavilədən çıxıb və sanksiyaları bərpa edib.   

Türkan İsgəndərli