Tokio birjasında yüksəliş davam edir

Tokio Fond Birjasında martın 26-da ticarət müsbət notlarla başa çatıb. 

TodayPress xəbər verir ki, Yaponiyanın aparıcı “Nikkei 225” indeksində artım ABŞ texnologiya səhmlərinin gecə saatlarında kəskin yüksəlişindən sonra sürət qazanıb.

“Nikkei 225” indeksi günə 246,75 bəndlik artımla yekun vuraraq 38.027,29 səviyyəsində bağlanıb.

Bu, indeksin 27 fevraldan bəri ilk dəfə 38.000 həddini keçməsi deməkdir.

Günün ikinci yarısında xarici investorların aktiv alışları nəticəsində indeks bir vaxtlar 400 bənddən çox yüksəlib.

“Fast Retailing” və “Tokyo Electron” kimi iri şirkətlərin səhmlərindəki güclü artım ümumi bazar əhval-ruhiyyəsini də müsbətə doğru dəyişib.

Eyni zamanda, pərakəndə investorlar arasında da müsbət dinamika müşahidə olunub. Bununla belə, avtomobil və bank sektoru səhmlərində zəiflik müşahidə edilib.

ABŞ tərəfindən avtomobil idxalına əlavə tariflərin tətbiqi ehtimalı bu sektorlara təzyiq yaradıb.

Daha geniş bazarı əhatə edən “TOPIX” indeksi də günü artımla başa vurub – indeks 15,37 bənd və ya 0,55% yüksələrək 2.812,89 səviyyəsinə çatıb.

Tokio Birjasının əsas “Prime Market” bölməsində 1.212 səhmin dəyəri artıb, 361 səhmdə azalma qeydə alınıb, 63 səhmdə isə dəyişiklik olmayıb. 

Qiymət Mahir